Rabee H.

السلام عليكم ورحمة الله وبركاته ، اسمي ربيع رجب حسن ، باختصار.. أنا والعياذ بالله من كلمة أنا ، صاحب موهبة ولله الحمد ، تُخْتَصرُ هذه الموهبة في استخراج ما يفكر فيه كل واحد مننا ، أصوغه بنصّ لغوي فصيح أو عاميّ ، بشعرٍ أو بنثر ، أكتب الحكاوي وألخّص الروايات والأفلام والمسلسلات ، وحتى أني أقتبس منها قصص قصيرة ، أعمل على تأليف سينياريو وحوار خاص بي ، وأكتب أيضاً حلقات يوتيوب حول مختلف المواضيع ، وأضف إلى ذلك أنني متابع رياضيّ ولذا يمكنني أن أكتب مقالات في هذا المجال ، وختاماً أنا طبيب أسنان وهذه مهنتي الأساسية ، لذا يمكن أيضاً أن أكتب حول المواضيع العلمية ، جاهز لأي استفسار ، ويمكن أن تزورو صفحتي على لينكيد ان او على مستقل والاطلاع على أعمالي السابقة التي تتضمن : قصص قصيرة للأطفال لصالح قناة يوتيوب _ قصص منوعة أيضاً لصالح قناة يوتيوب _ خواطر لصالح منصة (جوّك) ، وغيرها الكثير والسلام ختام..

بيحكولنا عن (الأمازيغ) ، عن (الإنكا) ، عن (الطوارق) ، كلو على العييين والراس ، وبعتقد أغلبنا سامع فيون ، لكن اليوم شو رأيكون إني جايبلكون معلومات عن شعب ، حتى هني (قبل عام 1958) ما كانو يعرفو بحالون اذا معروفين من قبل الغير او لا ، جاهزين؟

اعملوا كاسة شاي والحقوني نتعرف سوا عليون...

____

شعب ( البوشمن ) أو ( سان ) (كما يقال عنون) مجموعة إثنية من الصيادين بيعيشو بجنوب أفريقيا والجزء المجاور من (ناميبيا) (وبوتسوانا)....[[[ومنشان تركزو أكتر (ناميبيا) دولة تقع جنوب غرب قارة أفريقيا، بيحدها من الغرب (المحيط الأطلسي). وبتشترك بالحدود البرية مع (أنغولا) و(زامبيا) من الشمال، و (بوتسوانا) من الشرق و (جنوب أفريقيا) من جهة الجنوب والشرق...سهلة بس ركزوا ( ههه)]]]...

____

( البوشمن ) باللغة البرتغالية ، تعني "رجال الأحراش" أو "شعب الأدغال" ، ويقصد بهم القبائل الي بتسكن صحراء ( كالاهاري الإفريقية ) منذ أكثر من ( 22 ألف سنة) ، أمّا خصومهم من قبائل الهوتنتوت) فيسمونهم بـ "السان" ، هذا المصطلح يعني "دخيل" في لغة (الخويسان) الإفريقية، وهالشي يعتبر مهين إلهم ، و خلاهم يفضّلو انو يطلق عليهم اسم (البوشمن)، حسب ما بتحكي المصادر..

___

طبعاً صحراء (كالاهاري الإفريقية) ( والي ما كنت سامع فيا الصراحة) بتحتل مساحة واسعة من جنوب القارة ، وتم الإجماع أنو هالشعب هاد يعد أول من سكن القارة قاطبةً..

مو هون الصدمة (الأولى طبعاً لأن الصدمات كتار) ، بل الصدمة أنو اجا شب هيك أكابر جنوب إفريقي اسمو( لورناس فان دير بوست ) فضولو دابحو أكتر مني..

أخونا أصدر كتاب سماه The last word of the kalahari ، وبيتضمن هالكتاب بحث أجراه ع هي البقعة من الصحراء ( مدري شو خطرلو) ، وفعلاً صادف هالشعب ودرس حياتون بحذر ، وهون كانت الصدمة التانية ..

____

لاقى أنو هالشعب بيشبه لحد كبير العرق الآسوي ، بشرة صفراء فاتحة ، عيون ضيقة ومايلة ، مو بس هيك ، بل كان طول الواحد فيون ما بزيد عن ال 145 سم ، مع أنف قصير - وجه مستدير - شعر أسود وخشن ، بيحكو بلغة اسمها (الخوسية) بتضمن عدة أصوات استفهامية ..

ما بيزرعو ما بيربو مواشي ما بيصنعو ، فقط بيصيدو فرائسن بأدواتن البدائية الي هيي عبارة عن : قوس - سهم رأسه مطلي بسم الخنافس - حراب ، وهيك أمور..

----

طبعاً إلي حياتو كلها صيد ، رح يصير بارع فيه ، وهيك هني البشمانيين ، ماهرين جداً بالصيد ، وإصابة الفريسة ما بتحتاج إلا رمية واحد فقط..

أما الفريسة المفضلة عندون فهيي ( الظباء) ، والكبد تبع الفريسة يُقدّم للرجال فقط لاعتقادهم أنو بيحوي سم بيآذي النساء كتير ..

------

والصيد عندون مو بس وسيلة للعيش بل إنما بيرتبط بالرقص ، فكل ما يرجعوا من الصيد بيجتمعوا بمكان خاص بالموسيقى ، والنساء بتغني ، والرجال بيرقصو ليعبرو عن الفخر والفرح..

___

ما كانت مقتصرة حياتون فقط على هالشغلات فقط ، بل كان عندن طقوس دينية معينة ، فحسب الموسوعة البريطانية بيعبدو إلهين ( استغفر الله ) واحد بالشرق وواحد بالغرب ، واحد منن خلق الكائنات الحية والتاني مسؤول عن الموت والمرض ..(وهي الصدمة التالتة ل يلي لسا مركز معنا) ..

__

نسيتكون بشغلة انو الموسيقى بدورها كمان مقدسة عندن وبيستخدموها لعلاج المرضى ، عن طريق رقصة اسمها (رقصة الشفاء) ...

بيجتمعو عند الشخص المريض وبيبدأو بالرقص حتى يدخل المعالج بحالة من النشوة المضاعفة وبيعتقدو أنو هيي الي بتربط روحو بالمجتمع وبتخليه قادر أنو يستخلص المادة السامة او المرض من الجسم ، الجدير بالذكر أنو الممارسة هي انتشرت عند عدة شعوب حول العالم وصارت اسمها الطريقة (الشامانية) ولا زالت موجودة لحد هاليوم هاد..

ما خلصنا لسا..ضالل لسا شغلة...

فكمان هني بيتفائلو بالرعد وبيعتبروه البوصلة الخاصة فيين ، ولهيك بيقضو حياتون عم يلحقوه وين ما نزل ، بما انو رح يصير فيه أمطار والأمطار يعني نمو نباتات وثمار ممكن يستفيدو منن ..

---------

وبالختام قبائل البوشمن حالياً بتعيش بمحمية ببوتسوانا، تمّ إنشاؤها خصيصاً لحماية 5 آلاف من هالقبيلة سنة (1961).

وبما إنو بهالزمن ماحدا بيترك التاني بحالو فبمطلع ثمانينيات القرن الماضي، تم اكتشاف الألماس بالمحمية البوتسوانية، وبعد فترة وجيزة، قررت الحكومة البوتسوانية أن أفراد قبائل البوشمن الي بتعيش هنيك ، لازم يغادرو بسبب مكتشفات الألماس الكبيرة.

____

وللأسف لم يتبقّ من قبائل البوشمن سوى 60 ألف بعد ما تعرضت هالقبائل لموجات طرد كبيرة، في سنوات 1997 و2002 و2005، وبسبب تغّير طبيعة غذائن وطريقة حياتن..

وعلى الرغم من نجاح أفراد من عائلة البوشمن بالفوز بقضية بالمحكمة ضد الحكومة البوتسوانية سنة 2006، إلاّ أن الحكومة البوتسوانية ما وفرت أي جهد لمضايقتهم من خلال حرمانهم من الوصول إلى آبار المياه الموجودة هناك... للأسف هي ضريبة التطور ، متل ما كان نعمة على ناس فهو نقمة على الغير ، وما سبب انقراض عادات وتقاليد فقط بل سبب وعم يسبب انقراض شعوب بحالها..

___

وهيك بتكون خلصت حلقتنا لليوم عن هالشعب الغريب ، شو رأيكون فيا؟ وشو بتعرفو لسا شعوب متلو؟ بتمنى تشاركونا آراكون بالتعليقات ، وما تنسوا تضغطو زر اللايك والاشتراك وتشيرو الحلقة مع أصحابكون ، سلام

التطور غريب يا جماعة ، وهالحياة كلها غريبة ، ذكاء اصطناعي ، وموارد طبيعية بالهبل ، وأموال يمين شمال ، واستثمارات و و و...

وبالمقابل بتصفن شوي بهالبلاد ، وخاصة البلدان الفقيرة ودول العالم الثالث ، بتستغرب من كم المشاكل البيئية والمعيشية فيا ، فأكيد كل واحد فينا وخاصة الي عندو اهتمام بهالأمور بيشوف لما يفتح فيس أو إنستا أو يوتيوب ، تحذيرات من انتشار النفايات بشكل زائد على الكرة الأرضية ، وتقارير وصور لأطنان من المهملات الي مجمعة ، حتى لما تمشي بالشارع كتير بتجي عينك ع لافتات التحذيرات والتنبيهات الي بتمنع رمي النفايات الا بأماكنها المخصصة ، لكن للأسف الشديد ، لا حياة لمن تنادي...

--------

مو هون بس استغربت ، بل الي خلاني مستغرب أكتر هو أنو أثناء تصفحي لمقالات غوغل ومقاطع يوتيوب صادفت كزا معلومة عن حضارات بشرية بالزمان الغابر للأسف الشديد ، كانت السباقة لفكرة تجميع القمامة بشكل كتير منظم ، ومو بس هيك ، بل كمان من هالحضارات اخترعت طرق ما ممكن تستوعبا لإعادة استخدام النفايات بطرق كانت تعتبر بهديك الأيام فريدة من نوعا ، وأنا جمعتلكون كم معلومة رح اعرضا بهالفيديو ، لهيك ما تروحو ، وتابعو معي..

----

دلّت كتير من الدراسات الي اعتمدت على آثار مدينة بومبي أن الرومان اخترعوا إعادة التدوير، مستغلين قمامتهم لبناء المدينة الشهيرة بأثريائها ، إذ تبين أن الرومان اخترعوا إعادة تدوير القمامة، علماً أنهم سبقوا زمانهم جداً في التهوية تحت الأرضية والقنوات المائية واستخدام الخرسانة ضمن مواد البناء. 

وبومبي (ل يلي ما بيعرفا) مدينة إيطالية أثرية مدفونة تحت غطاء سميك من الرماد البركاني حين انفجر بركان فيسوفيوس عام 79 ميلادياً، وأدى اندلاع البركان إلى ردمها مع مدن مجاورة تحت ما يقرب من 6 أمتار من الرماد ...

_____

اكتشف العلماء أن أكوام النفايات الهائلة التي أُلقيت ظاهرياً خارج أسوار المدينة كانت في حقيقة الأمر "أراضي تحضيرية لدورات من الاستخدام وإعادة الاستخدام".

وقالت الأكاديمة الأمريكية المنضمة إلى فريق البحث الكبير العامل في بومبي (أليسون إيمرسون)، إن النفايات المذكورة كانت مكوّمةً بمحاذاة السور الخارجي شمالي المدينة بأكمله تقريباً، إلى جانب مواقع أخرى. 

وبلغ ارتفاع بعض الأكوام عدة أمتار، وكان من بينها قطع سيراميك وكلس يمكن إعادة تدويرها واستخدامها لتكون مواد بناء..

____

وصرَّحت أليسون: "وجدنا أن جزءاً من المدينة كان مبنياً من القمامة. لم تكن الأكوام خارج الأسوار مواد أُلقي بها بهدف التخلص منها، بل كانت تُجمع خارج الأسوار وتُصنَّف لكي يُعاد بيعها داخل الأسوار".

هاد الكلام أصدقائي أيام الرومان ، لا من سنة ولا تنين ولا عقد ولا قرن ، عرفتو ليش خبرتكون اني انصدمت واستغربت؟ ، أنو يا ربي هدول بهداااك الوقت وعملو هيك ، نحنا بزماننا هاد شو عم نعمل؟ ليش لسا فيه كتير مناطق ومدن ومنها المتطورة غرقانة بالنفايات!!.

____

ما علينا ، المهم ..ما توقف موضوع التدوير بوقتها ، بل رجع وأخد شكل أكتر تنظيماً ، منذ سبعينات القرن العشرين ، حيث ظهرت فكرة صناديق النفايات ويُعْتَقد أنو كانت من تصور المحامي الفرنسي (يوجين رينيه بوبيل )..

و بعام (1883)، تم وضع "قانون بوبيل" في باريس والي نفذ استخدام الحاويات المغلقة ، التي تفصل النفايات حسب نوعها على ثلاث فئات: المواد القابلة للتحلل، والورق والقماش، والزجاج..

____

خلال الحرب العالمية الثانية نفذت ألمانيا النازية أيضًا تقنيات إعادة التدوير، مو بدافع الحفاظ على الطبيعة ولكن لتخصيص الموارد للمجهود الحربي. وتضمنت سياسة إعادة التدوير الخاصة فيين فصل النفايات ل تلت حاويات : النفايات العامة، والنفايات الي بتحتوي على معادن، ونفايات الطعام.

لكن للأسف قوبلت السياسات النازية بمقاومة من قبل الدول التي احتلتها والجدير بالذكر أن الصليب الهولندي قام بتلويث النفايات لتقليل كفاءتها..

___

وبعد الحرب العالمية الثانية ، صارت الولايات المتحدة الأمريكية أكثر حذراً وتنبهاً تجاه هاد الموضوع ، فقام الرئيس بوقتا ( ريتشارد نيكسون ) بإحداث وكالة حماية البيئة الأمريكية ( EPA )...

____

مو بس الولايات المتحدة هيي الي تحركت تجاه هالموضوع ، بل عام 1972 قام الناشطان الهولنديان ( بابس ريمنز جاغرمان ) (وميب كويبر فيركويل) بتركيب حاوية في مدينة (زيست) لجمع الزجاج ..

____

وعام 1974 ، قام المغترب الأمريكي المقيم في تورينتو (جاك ماكجينيس) ، أثناء تجوالو على الشط بجمع العلب والزجاجات لأن منظرهم كان مستفزو ، وبسبب هاد الفعل الغريزي الي داخل هالإنسان الطيب ، قرر يعمل مؤسسة Five Foundation لتصنيف وفرز النفايات بدل من تجميعها ودفنها ، ولحقيتو عدة مشاريع وبلدان بأفكار مشابهة ، متل الصندوق الأزرق وغيرو كتير..

____

و ل يلي مابيعرف مشروع ال Blue box ، هاد مشروع انتشر ولاقى تقبل كتير بعدة بلدان ، بينص على انو هاد اللون من الحاويات بتحط فيه نوع معين فقط من النفايات ، وبعدو زادت نسبة إعادة التدوير من 6% عام 1965 ل 36% عام 2017..

------

توقف الموضوع عند المبادرات الفردية؟

أبداً لا ، بل قامت بلدية ( وودبري) بولاية ( نيوجرسي) بفعل كان الأول من نوعو ، حيث فرضت على السكان عملية فرز النفايات وإعادة التدوير باستخدام الصندوق الأزرق ، وتبعها عدد كبير من الولايات والمدن حول العالم ، وصارت هالقصة أمر واقع وواجب بنهاية القرن العشرين وبداية القرن الواحد والعشرين...

___

+ لكن متل ما حكينا بالبداية وكما يُقَال : ( ناديت إذا ناديت حيّاً _ لكن لا حياة لمن تنادي )

فرغم كل هالتسلسل التاريخي للمبادرات والفعاليات وحتى المؤسسات الرسمية بقوانينها ، ما كان كل هاد الشي كافي لتنظيم هالموضوع بكل أنحاء الأرض ...

+ واقتصر التصنيف وإعادة التدوير على البلدان المتقدمة والثرية ،( ومو كلها طبعاً ) ، بقى اتخيلو حال المناطق الفقيرة يا حرام!!...

+ لهيك مو غلط إنو إذا ب إيدنا كيس أو ورقة ننتظر لحتى نرميها بسلة المهملات..

+ مو غلط الي عندو قدرة يبادر وبعمل متل ما عملو أصدقائنا ويجرب يأسس أي شي بيساعد على نصنيف النفايات ، لعل وعسى باقي أقرانو بيغارو منو ، وبيتم تمويل وترخيص هالمبادرة ، بالنهاية فعل الخير مافي أحلى منو ، فكيف إذا كان لمصلحة كوكبنا الغالي؟

+ لا تنسونا من لايك وشير و اشتراك ، وشاركونا بآرائكم بالتعليقات وانطرونا بحلقة جديدة ان شاء الله ، السلام عليكم..